أنا وبيار

أنا وبيار اصحاب من زمان كتير
أنا وبيار التقينا بيوم عا هونيك بير

كنا تنيناتنا عطشانين
وكان عطشنا كتير كبير
صاحبي بيار كانت ضربة كفو ما بيوقف عليها حكيم
وبأيام الجهل كان ايدو اليمين للحكيم
بس بيوم من الأيام مرض الحكيم مرض عقيم
قلو لبيار دخلك شوف شو قصتي الله عليم
قام بيار طرقو ابره جابتلو آخرتو للحكيم
وبعد ما مات الحكيم وإنقبر بالظل
قام بيار ضبضب غراضو وفل
وأجا عا بلاد كلها ورد وزنبق وفل
كلو عمرو بيار كان أبن عيله كريم وحنون وبيحب الكل
التقينا أنا وبيار وصرنا أخوه وصار هوي ظلي وصرت أنا لالو ظل
وبيوم بنص دين الصيفيه قلنا لحالنا خلينا نفرفش شوي
اشترينا بسكلاتات لونن زهر كانو للبنات وللحريم
وطلعنا نكزدر عا الطريق المستقيم
مبسوطين ومزهزهين وكان بيار عم يغني لعبد الحليم
وفجأةً وصلنا عالنزله القويه
وصارو البسكلاتات يطيرو متل جوانح الحريه
وصرخ بيار بأعلى صوتو وقال
يا ألان صفا راحت علي
فلتو معي الفرامات ورب ربك ما بيهديني ولا شوي
ولك أنا حاربت عشر سنين وشفت ويلات تا حتى موت هلق عا بسكلات ؟
أنا وراه عم شوفو كيف نازل النزلي
وبالاخر وصل بيار عا آخر النزلي
ضرب بالحيط وقال آه يا ريت … وطار وغط متل الترغلي
قال لي يا ألان شفت نجوم الضهر ورجعت …يلا قوم وأرقصلي
رقصنا سوى ودبكنا وغنينا لعلاء زلزلي
تقبرني
بيار حبيب القلب شو ما بتقلو بيقلك فيلم وبدو يمشي
يا بتكون ممثل… يا بيمثلو فيك… يا بتصير تزقف متل الصراصير
هيدي فلسفتو بالحياة
كاس عرق
ومرأه حلوي
وموال أخو أختو
وإذا ضل فيه فراطه بيعطيهن للعايزين
سياستو واضحه لنو شمال ولنو يمين
لبناني تعلم يحب خيو ويقول بآخر الصلا
آمين
الكاتب ألان صفا صديق بيار