النحله والدبور

مبارح غطت نحله عا نرجستي المزروعة عا راس الجبل
مبارح غمرتني وسقيتني عسل و بتمها غرقتني بالقبل
مبارح وج الضو وعا نتفي
كنت إنطفيت أكتر ما أنا مطفي
اجت وولعت قنديلي
صارت تغنيلي وقصص تحكيلي
نحله و زلقطه عقصت الدبور
وحولت نرجستي من ورد لمنتور
قالتلي قوم ولحقني إذا فيك يا فرفور
أنا نحله وإن كنت رجال فرجيني إذا كنت دبور
من وين جيتي يا نحله ؟
من طرابلس أو من صور أو من زحله ؟
أنا قاعد هون مبسوط والبسط رايحلي
تعي انتي لهون عا راس الجبل أريحلي
بلا ما نتعب من المشوار وبلا هالرحله
النحله قالت لي ما كنت عارفتك هالقد كسلان
قاعد هون وحدك و تاركو ينساك الزمان
قديش صارلو تمك ما ذاق طعمة الرمان ؟
قديش صارلك قاعد هون وحدك وبردان ؟
قوم مشي معي يلا تا آخدك عالبستان
قوم لحقني تا فرجيك نجوم عصر العسل بطقة الضهر
قوم يا مظلوم تا فرجيك عالكروم
حسيت حالي غرقان واجت النحلي تشيلني من البير
حسيت انو العمر بعدو مجنون ومثير
غمرتا وغمرتني وبلشت النحله تطير
أخدتني ولبستني تاج وعملتني أمير
ومن بعد هالرحله الله أعلم شو رح يصير ؟
ألان صفا