شو صعبي الغربي
شو صعبي تكون بعيد عن بلدك وعن الأحباب
شو صعبي تكون حاسس كأنك عريان بلا تياب
حلمت مبارح حلم خوفني
حلمت اني كنت عريان والشمس انكسفت مني
كسوف الشمس منو قليل وغياب نورها شي مستحيل
حسيت بس انكسفت كيف البرد تعبط فيي وصرت متل الذليل
قلت لحالي كيف رح شوف الدني من دون نورك يا شمس كيف ؟
كيف رح أقدر اكتب شعر واتغزل فيكي يا جمرتي كيف ؟
قلتلها ما تنكسفي مني يا شمس
انتي يا روحي بكرا واليوم وامس
انتي يلي حبك نغرز بقلبي غرز
انتي يلي بتعشقك غصون الأرز
انتي يا زلغوطة أم العروس بيوم العرس
دفيني يا شمس دخيلك دفيني
لعبي معي وبنورك داعبيني
ما تتركيني مطفي ومعتم بترجاكي تضويني
أنا من دونك يا شمس مقطوعه كهربتي
زلطي شرايطك ووصلي شريطي وكهربيني
وحرارتي رفعيها وعالسما لعندك خديني
وحياتك يا شمس بس غبتي عني
صرت بردان وملحد وبطلت آمن بالجنه
بحياتك ما تنكسفي بقى مني
ذبلو ورداتي خلصو حكاياتي واندثر فني
رجعي بحياتك تا نرجع سوا نشرب كاس الحب ونغني
رجعي شتقت لشفافك الحمر والشوق رح بيجنني
رجعي نغطس سوا بالبحر آخر كل يوم ونسهر عا ضو القمر
رجعي وحياتك أنا من دونك عريان زهقت من السفر
وبس ترجعي خديني معك عا بلادي تا آخد صور
ما بدي ضل عنك يا لبنان بعيد
كل واحد بعد عنك مات من قهرو وبالغربي إنقبر
ما بدي اوعا شي نهار ويجيني خبر
إنو العمر خلص وانطفى ضو القمر
يا شمس بلادي
انتي يا حبيبة قلبي
انتو يا ولادي
انتو يا حبايب قلبي واخواتي
انتو يا ولاد بلدي يا رفقاتي
دفوني وبالغربي ما تتركوني
أنا مش ناسيكن
انتو ما تنسوني
بقلم وقلب ألان صفا
