شهر العبادة... للحمار
فيلم أميركي طويل ...وشعب الله باركوا بطوايف طايفي وألمي مقطوعة والموتورات شغالة والكسارات يا ليل يا عين
وجيل ورا جيل ...وآخر جيل هيدا هوي جيل الآذاريين المذريين
من زمان كان آذار شهر البذار
و اليوم صار آذار شهر العبادة والخشوع لكل حمار
جيل آذار جيل ما بيعرف كيف وليش وايمتى وشو صار؟
الفيلم الأميركي بعدو طويل و اللعيبي صارو كتار ومفتوح عا وسعو البازار
كتار نسيو إنو في عدو اسمو إسرائيل بتتمنى لنا الخير وبتدعيلنا ليل نهار
وصارو مشغولين كيف بدن ينظمو لاسرائيل أشعار
الشعوب الراقية عم تدفع ضريبة ليصير عندها معاش تقاعد بالشيخوخة
الشعوب الراقية عم بتنتخب برامج مش ولاد أخوات شيخوخة
وشعبنا المخبول بعدو عايش عالمعمول المد والسنيورة
٧٠ مليار دولار دين ..وقولكن ليش اللبناني مش فارقة معو وكائنو المليارات شي صندوقة بندورة ؟
الجواب واضح ... ما حدا عندو أمل بهالبلد والكل ناطرين تا تجي العصفورة
ومش عارفين هالمجانين انو العصفورة بيتها بالعصفورية ما إلها بلد واحد وما عندها طايفي وما إلها دين
يلا يا شباب حضرو حالكن عا جولة جديدة من الشعارات وحجزوا دوركن عا بواب السفارات وجددوا هالبسبورات
شباب بيفوتو عا الجامعة تا يتعلموا ويصير عندن شهادات
والزعماء بيبعتو ولادن لبرا ومعهن الباسبورات الدبلوماسية على أبعد القارات
وولادنا الأذكياء كتير يلي تعلمو طب وهندسة وحقوق بيطلعو بالآخر بلا حقوق
بيقفو بالصف عا باب الزعيم ويلي بيفتح تمو منن بياكل عا وجو كف
بلكي بيوظفن شي وظيفي حاجب أو محجوب أو يفتش عن شي مطلوب عالرف
صرنا بل 2010 وبعدنا ما حسينا بالحشرة ؟
صرنا بس نوصل عا بلاد برا يعاملونا متل الحشرة وبعدنا مش حاسين بالحشرة ؟
مبارح عرضوا عالتلفزيون الفرنسي فيلم وثائقي عن لبنان شي فظيع وشي رهيب وبيسوى يكون مقدمة للنشرة
لبنان البلد المديون ويلي عندو 15 % بطالة ويلي شعبو محروم ،هوي أكبر بلد بالعالم بيستعمل بوتوكس و مواد تجميل للبشرة
لبنان يلي السياسيين والزعماء فيه عم يتناحرو مين أم الصبي مين ؟ هيدا البلد بلد السيليكون والديون و الطائفيين المجرمين
وين في بلد بالكون متل لبنان وين ؟
لبنان بلد العز واعلى جبين ..مظبوط يا حبيبي يا استاذ وديع الصافي ..بس لمين ؟
فيلم أميركي طويل أبطالو معروفين وصارو كتير مشهورين ...بس بعد في ناس ما بتعرفهن مين ؟
هودي الناس هني الآذاريين ...يا رب دخلك عين
بكرا بيبلش تشرين التاني ومن بعدو بيجي كانون
وكانون هوي شهر المدافع والصواريخ
ما تسألوني كيف وليش .. ولو شو نسيتو كتب التاريخ ؟
التاريخ عم بيعيد نفسو لانو الفيلم بعدو ما خلص
بعد ما صار في ترانسفير من فلسطين لاهل 1948
بعد ما صار التوطين بعد ما ترحلو من لبنان المسيحيين
بعد ما تقاتلو وذبحوا بعضهن المسلمين
وانتو شو بعدكن ناطرين ؟
ناطرين يطلع القرار من بلمار ؟
شايفين كيف بلمار وآذار متفقين ؟
يا حلوين القرار نكتب من سنين
وبكرا بيجي كانون وبتتذكرو هالشهر الملعون
وما تنسو إنو بنص كانون رح يدق التلفون بعيادة الدكتور بوتوكس
الصوت بيقول ..دخيلك يا حكيم جوزي زعيم بس أكل بوكس ...فيك تطرقو شي ابرة بوتوكس ؟
وأكيد رح يطرقو بوتوكس مش بس مرة ومرتين ..رح يطرقو بوتوكس كل مرة بتحوم فوق بيروت طيارة الأواكس
والفيلم ماشي والتصفيق ماشي والبلد ماشي
عالجحيم
... والبوتوكس ماشي وعيادة الحكيم ملياني آذاريين مجانين
No comments:
Post a Comment