من بعيد لبعيد صرت متل بنت كانت تحلم بالقمر يغمرها كل ليلة
صرت واقفي وعم شوفك تبعدي عني و بيناتنا في شريط حديد
من بعيد لبعيد حسيت كيف الريح أخذتك مني
من بعيد لبعيد عم أسمع صدى غنيتك الجديدي كلماتها مش عم تحكي عني
هيدا القمر يلي كنت خبرو كل شي عنك ، هوي رح يخبرك من يوم ورايح كل شي عني
إذا رجعت شي نهار ولقيتني بعدني لابستلك الأبيض ،ما تنغش وتفكتر إنو هيدا هوي الفستان
تطلع منيح وشوف كيف صار فستاني الأبيض صار كفني
ما تقول اني كئيبة وعم فكر أفكار سوداوية
ما تقول اني سلبية ...
قول اني إنسلبت بقلبي وبعقلي وبروحي وبعينيي
وبدك ياني كون فرحاني وشريط الحديد المشوك عم يبعدك عني وجرحلي إيديي ؟
نورك يا قمر كان نعمة وفرح واكبر سبب أني كون عشقاني
واليوم نورك يا قمر صار لعنة، لانو كل مرة نورك بيلمسني ،نار الفراق بتحرقني
هيدي آخر مرة بشوفك فيها يا قمر
أنا رايحة عا مملكة العتمة
وإذا شي نهار رجعت تذكرتني
تذكر إنو الفستان الأبيض يلي كنت البسو وأحلم انك شي يوم تفك زرارو
الفستان صار كفن واندفن معو الحلم وناطر تا تجي أنت تا تقوم قيامتو ويبوح بأسرارو
فستان أخذ معي سنين وقياساتو عا قد الحب والولع والشوق والحنين لخياطو
أنت خيطت هالفستان وبتعرف منيح نوع قماشاتو
أنا من دونك عرياني والفستان صار كفن ، يلا تعا ورجعني تا عيش ولبسني الفستان ورجاع فك زرارو
و إذا ضليت بعيد عني و ما جيت بكون فشيت خلقي وحكيت
وبيضل الحلم ملكي أنا ولو بدك تشك براسك ريش, بعد اليوم مش رح تسمع اخبارو
No comments:
Post a Comment