أوقات لمن بدي أكمش اللحظات يلي عم تهرب مني
لمن بدي اغمر الوقت يلي عم يروح وما خليه يهرب مني
أكمشن منيح ،بس ما أقدر ..الوقت يلي عم يفلت ونحنا عم نكبر
أوقات الكلمات بتخلص والنهايات بتخلص تا تبلش أسطر جديدة
والافكار بتصير متل النار ،بتهب لحظات وبتنطفي لحظات وبتكفي بطريقها الحياة
وأوقات لمن بحس كأنو كل شي إنتهى والحبر عم يخلص ،بتذكرك وبيبلش الدم يصير حبر وبكتبلك شعر
والوقت معك بيصير معجزة بيعجز العقل يفهما،وبصير متل شي ولد زغير بدو يعد كل نجوم السما
وكلما عديت نجمة وكتبت عليها أسمي كنتي تضحكي وتبتسمي
والوقت يصير ملون متل شي رسمة مرسومة بأيد رسام
وبيبلش عمر جديد ووقت جديد مش من ثواني أو دقايق أو ايام
الوقت عم يخلص مش بس لانو عم نكبر
الوقت عم يخلص لانو حلمنا صار مع الوقت أصغر
لو إنو حلمنا بعدو متل يوم كنا زغار
كان الوقت بيصير لعبة تخابي منلعبا بالدار
و المسافة بين الوقت والعمر ما بتصير بس ٣ أمتار
وما منسمع القلب عم يشتكي والعقل عم يسألنا دخلكن شو صار ؟
عم أسمع همسات ووشوشات حسستني برعشة
سمعت صوتك عم يقلي يلا تعا معي لفوق الغيوم تا نمشي
وبس مشيت معك هز براسو الوقت وقلي عيش الحلم وإذا ما عشتو غير حالك ما تلوم
سوا مشينا سوا ربينا وسوا رح نخلي الوقت والحلم يتجدد فينا تا ما ننسى أسامي أحلامنا وهني ينسو اسامينا
و تا يبلشو اصحابنا يتمثلو فينا و يلحقونا عا بلادنا وتحلى ليالينا
وبليلة كانت الدني يأساني وكان الوقت عم يقلي إنو رح زماني
صارت الليلة سعيدة و الدني صارت جديدي والبنت يلي كانت وحيدي حطت ايدها بأيدي
ساعاتنا كبينا والوقت من موبايلاتنا خفينا وغير كلمات الحب ما سمعو دينينا
وصرنا نضحك ومش فارقة معنا إذا الناس ضحكو معنا أو ضحكو علينا
الوقت بيكفي لنعيش مليون سنة وأكتر إذا كنت بعدك عم تحلم وبعدو حلمك عم يكبر
الحلم بعدو عم يكبر ... ما تخليه يزغر
No comments:
Post a Comment