وقت كان عمري عشرين سنة كنت ساكن بمدينتي بيروت وكان عندي سيارة أوستن لونها اورانج وكانت بتعرف تسوق وحدها بزواريب بيروت .
كانت سنة 1982 واجتاحت إسرائيل بيروت وبعدها بخمس سنين صارت الحروب أوحش والزعماء صارو يتوحشنو أكتر وما عاد فينا نعيش ببلدنا الصغير واضطريت آخد عيلتي وسافر وطير وتركت سيارتي الأورانج وحدها بموقف البناية ببيروت .
وبعد 23 سنة رجعت زيارة عابيروت وما بعرف كيف أخذني الحنين عا حينا القديم عا مطرح يلي تركت فيه سيارتي قبل عشرات السنين .
وشو تأثرت بس شفت سيارتي القديمة صايرة متل الهيكل ومتل شي ختيار بطل عندو سنان و بيضل جوعان ورجعت الذكريات والحكايات وبلشت أسمع صوت فيروز وأغاني زياد وبلا ولا شي ..بلشت أسمع أصوات عم تطلع من السيارة وشفت عزقة وحدها في برغي بعدو جديد ومش مصدي .
برغي نافر وناطر والعزقة بحضنو غامر ،بس شافني عرفني وبلش يبرم لوحدو ويحكي ...
قلي أنا برغي صارلي هون 23 سنة ما تزحزحت من مطرحي
تخبيت كل الحرب وتخبيت بالصيف وبالشتي
أنا برغي كنت وحدي كل الوقت وصابونتي بطلت ترغي
صرت صلي لربي كل ليلة و قلو دخيلك يا ربي بعتلي الرزقة وخليها تجيني شي عزقة
وبليلة كان فيها القمر سكران ومضوي كل الأضوية ،سمعت صوت جاي صوبي وبلش قلبي يدق ويغلي
طليت راسي المخبى وشفت عزقة حلوي دخيل ربها
ركضت صوبي وركضت صوبها وتطلعت بالسما وقلتلو بشكرك يا ربي
وشي أني كمشتها شديتها لعندي وهي شدتني
بعد كم تكي بلشت صابونتي الناشفي ترغي
وكل ما شدينا عا بعضنا أكتر
كل ما الرغوة صارت تكتر وتكبر
وصار القمر يضحك علينا وسكرتو معو صارت تشرب من رغوتنا و تسكر
وبقينا نشد عا بعضنا تا ملصنا
وهرو سنان البرغي كلن ونحنا بعدنا ما خلصنا
وفجأةً أجا رجال تعطلت سيارتو وناقصو عزقة
بلش يبحبش ويفتش بهالسيارة ونحنا تخبينا تا ما يشوفنا ويفرقنا عن بعضنا وكتير صلينا
بلشنا نصلي ونقول يا رب هالبرغي والعزقة مع بعضهم خلي
والرجال بلش يفكفك واجرينا بلشت تسكسك
وشوشت حبيبتي العزقة وقلتلها يا عزقتي ويا نعمة ربي ويا رزقتي
دخيلك شو ما صار خليكي معي وضلي حدي ومني ما تفلتي
فوتي وإندحشي فيي أكتر وخليكي قبالي تا يضلو يشوفوكي عينيي
وبعدما الرجال فتش وتعب كتير ،زهق وفل
و من فرحتنا بلشنا نغل ببعضنا غل
وبعدنا ناطرينك يا الآن تا تجي عا لبنان وعلينا تطل
ناطرينك تا ترجع تصلح سيارتك وترجع تاخدنا معك مشاوير
شتقنا نسمع صوت فيروز الصبح مع زقزقة العصافير
شتقنا للاشرفية ولجونية وللمنارة ولشارع الحمرا وشتقنا نروح عا السينما ونسمع صوتك أنت ورفقاتك ،،شتقنا لسمير
منترجاك ما بقى تفل وتتركنا ... خليك ببلدك حتى لو مش قادر تصلح السيارة .. بيكفي تجي تشرب معنا قهوة كل يوم الصبح بكير
No comments:
Post a Comment