بتحب البحر والبحر بيحبها كتير
ألسمك ما بياكل إلا من أيديها الحرير
سمكة ذهب هي والبحر بيحبها كتير
في يوم لبست زهر و نزلت عالبحر
شي إنو وصلت عالشط فاح من جسمها العطر
ريحة بارفانها بتاخذ العقل و بتقتل قتل
بتدوخ راس الحوت و بتخليه يزحف عا بطنو من القهر
فحت الريحة ووصلت لعندي
تركت قهوتي
تركت بيتي
تركت سيارتي
و ركضت حافي ماراتون العصر
وبعد شي كم دقيقة وصلت
شفت البحر منو بحر
شفتو صار لونو زهر
شفت السمك عم يرقص
والموج عم يحرس
و شفتها عم تغطس
وكلما غطست بالبحر وطلعت عالشط
صار قلبي يرقص وعقلي ينط
وركضت صوبها وقلت لحالي بلكي بتعلمني الغطس
قلتلها دخليلك علميني اغطس بالبحر إذا فيكي
وإذا ما فيكي تعلميني اغطس بالبحر
علميني اغطس فيكي
ضحكت وقالتلي يا الآن هيئتك بعدو عودك طري وبعدك غشيم
ولك يا ابني يلي بدو يغطس فيي لازم يكون محنك
و ما لازم يكون لا مصدي ولا متنك
لازم يكون رجال بيعرف بعلم الفلك
منشان ما يغرق بفلكي إذا موتور قلبو إحترق
قلي أنت شو بتعرف بعلم الفلك ؟
وقلي إذا كان فلكي فلك من هالافلاك
ليش عايزك فلكي وليش بدو ياك ؟
وإذا ما كنت عايزتك ..ليش حتى علمك تغطس في
إذا كنت عايشي فيك وبلاك؟
ليك شوف كيف السمك عم يقلي شبيك لبيك عبدك بين ايديك ؟
ليك كيف الحوت رح بيموت تا يبوسني وصاير ضايع متل دويك
كنت رح كبك بالبحر تاتموت قهر ... بس أنا شفقني قلبي عليك
No comments:
Post a Comment