صليت كتير تا صير قماش حرير
لاني بستحي من حبيبتي كتير
قلت لحالي إذا صرت فستان
هيك بكون حدا كل الوقت ومش ضروري أحكي كتير
و بليلة شتي هب الهوى والأعاصير
فتحت تمها السما وضحكت كتير
صوت الرعد خوفني و لمع البرق عملني ضرير
مد ايدو القمر واخدني لعندو بلمحة بصر
غبت عن الوعي وما عرفت شو عم بيصير
فجأةً شفت حالي بايدين زياد نصير
بإيدو مقص بس شافني تفاجأ وغص
قلي يا الآن شو صار فيك وكيف تحولت وصرت قماش حرير ؟
قلتلو يا زياد كنت عم صلي تا صير قماش حرير
بدي ياك تعملني فستان تلبسو حبيبتي ليل نهار
بدي يكون قياسو صمول تا كون ملزق فيها عا طول
وشفافي بالقماش وزعهن داير مدار
عالخصر عالضهر عالبطن عالصدر
وعا كل زاوية بيتمرجح فيها العمر
وأيدي بدي ياهن عا الأرداف منشان صيب كل الأهداف
بدي كون فستان السهرة وقميص النوم وتياب الشغل كل يوم
بدي حريري يلزق بحريرها ونغزل سوا صوف العشق بوقت الصوم
ضحك زياد وقلي يا الآن ..هيدي أول مرة بحول رجال لفستان
هيدي رح تكون أول مرة المرأة بتلبس رجال ليل نهار
رح ركب لفستانك زرار وسحابات وزنانير
كل زر بيقهر قهر وألسحاب بيسحب الروح وبتطير
والزنار رح يكون شعلة نار بتذوب الجليد وبتعملو بخار
وفستانك يا الآن ما بينغسل إلا هوي وملبوس
بس بدها تدوش حبيبتك أنت كمان رح تاخذ دوش
وقماشتك الحرير ما بتتبلل بالمي
..بتتبلل بس بعرق معطر من عطرها الغي لا روش
يلا نام يا الآن تا قصك من نصك واعملك فستان
وتصير قصتك قصة عا كل لسان بلبنان
نمت وقصني زياد بالمقص
وبلشت حس كيف بس تلبسني حبيبتي رح حس
وصرت انفخ وقلبي يدق
وكلما يخيطني أرجع أفرط القطبة وزياد يقلي بليز بس
خليني خلصو لهل الفستان صار آخد معي سنة ونص
وحبيبتك واقفة بالزلط برداني
...حرام عليك تخليها ناطرة والناس عم تبص
وبعد التعب والخياطة والقص
وبعد ما هلك زياد قد ما شكشكو بالستراس
اجت حبيبتي ولبستني وطلع عا القد القياس
وجسمها حس بالدفا وبالامان وراي
وصرت لحبيبتي فستان ومتراس
No comments:
Post a Comment