سنة جديدي جاي عالدني ،سنة عمرها سنة
بتجي وبتروح ومن بعدها بتجي سنة
وسنين كتار متلها اجو وراحو
تركو وراهن اخبارهن واسرارهن
تركو أحلام صارت حقيقة بعد كم سنة
وتركو أوهام صارو كوابيس وشياطين عم يلعبو بهالدني
وتركو عشاق صارو رفاق تاني سنة
وانتي يا سنة يلي جاي تتولدني
مهما كبرتي وتكبرتي بيضل عمرك سنة
وأنا كنت قبلك بسنين وتعرفت قبلك عا شي خمسة وأربعين سنة
وكل مرة بتجي سنة جديدي والناس بيولعولها الشموع
وبيفرقعو وبيرقصو وبيشربو وبيعملو المسموح والممنوع
وفي ناس بتبكي من الفرح
وفي ناس من الاشتياق والغربة بينزلو عا خدودهن الدموع
وفي ناس متلي بيكبتو أشعار وبيتذكرو يلي بعدو ما صار
يا سنة الألفين وحدعش يلي جاي ماشية عالحدعش
أمشي عا مهلك وتغندري ،سمعي مني يا سنة ..العجلة ما بتنفعش
من أسبوع حكيت مع أختك ألسنة يلي بعد من عمرها يومين
قلتلها أنك كنتي سنة ماشالله عليكي ويخزي العين
بس هي كانت زعلاني وعم ينزلو دموعها من العينتين
كانت ندماني لانو نسيت إنو عمرها سنة وحدي مش سنتين
وانتي يا حلوي يلي جاي عالحدعش وعم تتمايلي عالميلتين
خذينا بحلمك وعطينا وقتك
تا نفكر نحنا مين وشو بدنا منك يا سنة
ولوين بدنا نروح معك لوين ؟
خذينا لمطارح ما بتأذينا
خذينا عا تلال بتعشق الجبال
خذينا معك وأطفال خلينا
متلك يا سنة يلي عمرك سنة
بدي عيش متلك يوم بيوم
بس ما بدي انسى الصلى وانسى الصوم
بدي أتذكر اني متلك بضل زغير وما بكبر
ليش مننسى يا سنة إنو عمرنا بيضل زغير وما بيكتر ؟
متلك أنت يا سنة منجي ومنروح عالدني
مننسى إنو نحنا بشر عمرنا قصير
ومننسى الله ومننسى الضمير
ومنبلش بالحروب ومنخرب الأرض ، هالبيت الزغير
ومنصير حيوانات برية عايشين بجهنم الانانية
وبس تجي الساعة ،ساعة الرحيل بلحظة مصيرية
منتذكر مين نحنا بعد فوات الأوآن وبتخلص الخبرية
خذينا معك يا سنة عا شي مستشفى أطفال أو عا شي جمعية خيرية
بركي منتذكر إنو الصحة أهم من مال الدني وبترجع لقلوبنا الأنسانية ؟
وبركي منعمل جهدنا تا ما نأذي حدا
وتا نساعد غيرنا ونحافظ عا الصدق والعفوية ؟
وخذيني لعندها ليلي أخذت مني عقلي وقلبي وروحي وعملتن كاس نبيذ
ويلي شربتني من الوريد للوريد
ويلي خلقتني عن جديد
وصرت متلك يا سنة كل يوم عندي عيد
خذيني لعندها تا تولعني وبنزين عشقها على ناري تزيد
حتى نذوب تنيناتنا ونصير شوكولاتة ياكلوها العشاق بيوم العيد
يلا تعي يا سنة وخذيني لعند يلي أخذتني وغيرتلي كل المواعيد
ويا اصحابي ويا أحبابي ما رح قلكن سنة سعيدة
لانكن انتو السعادة ولولاكن أنا كيف رح كون سعيد ؟
No comments:
Post a Comment