الصراع على السلطة
هيدا هو السبب الرئيسي لاغلب الحروب بس يا خي ما بعرف ليش العالم ما بيتصارعو عالبيفتاك أو عالبوم فريت ؟ إنو ليش عالسلطة بالتحديد ؟
إنو معقول يكون في شي مهم بالسلطة نحنا الشعب البسيط ما منعرف سرو؟
طيب الصراع على السلطة شيء معروف عالمياً .إنو ببلاد برا الصراع هوي يومي بس شو بيسمو الصراع الدائر حول لبنان ؟
أكيد منو الصراع على السلطة .لانو الشعب طفران ومنو قادر يشتري خسة من ايام يلي غنى جوزيف صقر لصاحبو رضا وقلو اسمع يا رضا ،كل شي عم يغلى ويزيد ،مبارح كنا عالحديدي وهلق صرنا عالحديد ، والخسة اللي موصلها بأيدي وسعرها مقيد بالجريدي ،حطولا أسعار جديدي .
فأذن الشعب مش قادر يعمل صحن سلطة ...طيب شو القصة والصراع على شو ؟
أيه يا اخوان جيراننا المناح والعاطلين وكل يلي بيحبو المطبخ اللبناني صراعهم على التبولة نعم الصراع على التبولة هو سبب مشاكلنا كلها وطالما إنو التبولة بعدها طبق لبناني سييبقى كل المتآمرين على الشعب اللبناني يطبقون على أنفاسنا ...طيب ليش حتى نضل متعربطين بالتبولة ؟
صار لازم نتخذ قرار بالاجماع بجعل التبولة طبق تحت رعاية اليونيفيل حتى ترسيم الحدود بين المطبخ اللبناني والمطبخ الدولي لطبخ الموءامرات الدولية .
بس أنا يلي خايف منو إنو حتى لو حطينا التبولة تحت رعاية الأمم المتحدة رح يتصارعو عالحمص والبابا غنوج يلي سمعت إنو اردوغان بس كان بلبنان طالب بأعادة هذا الطبق إلى تركيا والله يستر مش بكرا اخواننا السوريين يطالبو بتعويض عن الكباب الحلبي وهيك ما رح نخلص إلا ما يصير المطبخ اللبناني فرع لماك دونالد .
No comments:
Post a Comment