مرايتي أمي

يا أمي رح يصيرو عشر سنين
يا أمي مشتاق ودوبني الحنين
يا أمي أنا بعرف أنك مش سامعتيني
يا أمي محل ما انتي ما فيكي تشوفيني
يا أمي أنا مش عم أحكي معك صدقيني
أنا عم أحكي مع حالي
عم شوفك بوجي بمرايتي الحزيني
يا أمي كلن كانو يقولولي ماشالله شو بتشبه أمك
منشان هيك يا أمي بلشت اكتب ما توقفيني
من وقت يا أمي كنت جواتك
كنت ورح ضل جزء من حياتك
أنا ياامي نزلت وحدي من ذاتك
من يومها بلشت أسمع الحكايه
من يومها صرتي بحياتي انتي المرايه
من يومها انطبعت كأبتك صور قدامي وورايي
انظلمتي يا أمي من قبل ما أجي عالكون
سرقو منك الحلم وكومو ألهم عا البك ألف كوم وكوم

بس حلمك يا أمي ضل عايش جواتك
أنا شفتو مرات كتيري عم يعلب بنظراتك
حلمتي تركبي طيارة وتجي لعندي … وجيتي
حلمتي تقصي شعرك وتصبغيه … وصبغتي
حلمتي تعملي مكياج وتحطي حمره عا شفافك … وحتيطي
حلمتي تشيلي عن راسك ألغطا … وشلتي
كلن يا أمي عملتيهن قبل ما تموتي
همك يا أمي صار همي
همك صار هم كل بنت وكل مرا وكل أم
تركتيلي يا أمي عاطفي لاعطيها لكل بنت محرومه من العاطفه
تركتيلي يا أمي ضو تا ضوي عا كل بنت مظلومه
تركتيلي يا أمي دوا اسمو الحنان تا أعطيه لكل واحد ناقصو حنان
يا أمي أنا ما بعمري كنت صرت متل ما أنا لولاكي
يا أمي شفت عذابك وشفت كيف الناس بتعذب الملايكي
تعلمت شوف الحاجه ولبيها
تعلمت انو ما خبي العاطفي .. تعلمت اعطيها
تعلمت انو العطاء أفضل من الأخذ لانو المحبه فيها
يا أمي أنا حبيت يلي سمعوكي انتي وعم تعني
ربهن ما كنت أعرفو ما كان ربي
بس يا أمي شفت أعمالهن شفت المحبي
صرت صلي لربهم ورتل وغني
يا أمي المحبه شفتها أنا وزغير بعيونهن هني
هني يلي ساعدوكي وقت ما كنتي رح تجني
هني يلي عطيوني أم تحضني
كيف بدك ياني يا أمي أنسى كل هالسنين
مش نحنا وزغار علمتونا انو من تحت جريكن بتمرق الجنه ؟

ألان صفا