لو كنت عاشق أكاديمي
كنت حسبت مية حساب
كنت تحركت بس العقل يقلي
وكنت خليت القلب بالبراد
وكنت بس بدي حب
حب متل الأكل من دون بهارات
بس أنا عاشق بيعشق بقلبو
وبيعرف إنو قصيرة كتير هالحياة
منشان هيك رح حب مرا أكاديمية
وعلمها تعشق الدني متلي
تا نقدر نخوت سوا
خوات
ونعمل بالحب صولات
وجولات
الدني بطاطا حلوي
يا حلوي
لازم تنسلق
وتتقشر
و تتاكل
مرة وحدة
مش سبع مرات
وكلما نحب بقلبنا
أكتر
منتعلم فيها قيمة
الحياة
وكلما خلينا عقلنا يقرر عن قلبنا
كلما أكلنا أكل
بلا طعمة
وبلا بهارات
العقل زينة
بس القلب زينة العقلات
الحب خبز عربي
الحب كدوشات
الحب مناقيش بزعتر
ممرمغ بالزيتات
ومخبوز بفرن الحطب
عالحطبات
الحب خبز فرنجي
الحب باغيتات
ملياني جبنة بيضا
ومحمصة
بالمايكرويفات
الحب ترويقة عالريق
يا صائمات
قومو فطرو
قومو كلو
حب من فرن الكلمات
قومو يا أكاديميات
قومو يا نسوان ويا بنات
قومو يا عاشقين
ويا عاشقات
الترويقة صارت جاهزة
قومو قبل ما يبردوا
المنقوشات
No comments:
Post a Comment