كل يوم بتوعي الصبح بكير
وبتوعي الشمس والعصافير
بتشلحي عنك قميص نومك الحرير
وبتلبسي شورت قصير
و بتفتحي الباب
وتبلشي تركضي
وبيبلش يصير لون وجك موردي
وبعد كم دقيقة
بتبلشي تعرقي
ونقاط العرق بتصير بحر
وكلما ركضتي عا شط البحر
البحر بيهوج
وبيصير بدو يحبك الموج
حرام عليكي
تعملي هيك بالموج
كل يوم الصبح بكير
البحر بيضوج
بينطرك تا تركضي
تا يصير عندو موج
كرمال الله
ركضي غير مطرح
صرخو البحارة
وسفينتن رح يغرقها الموج
كرمال الله
ركضي غير مطرح
تعي ركضي معي
وخلينا سوا نفرح
بركي إذا ركضنا سوا
بيجن الهوى
وبيهوج بحري
وبيطول عمري
وتسونامي عشقي
بيقلع أشجار
وبيكسر الحجار
تا نبني الدار
ونصير نركض
أنا وانتي
عالسطح
كل ليلة
عا ضو القمار
وأنا وراكض
صير أنظملك شعار
والموج بيهاجر
والطير بيهاجر
وبيرجع لعندنا
جايب معو خبار
إنو أنا وانتي
ربحنا مارتون العشق
والجايزة الكبيرة
بيكار
تا نرسم الكون
ونركض سوا
مشوار العمر كلو
وياي شو حلو هالمشوار
No comments:
Post a Comment