لغه جديدي

خلصو الحروف وخلصو الكلمات
وبعدني مش قادر عبر عن المكنونات
خلصو الأشعار وخلصو التعابير
وبعدني مش عارف شو عم بيصير
الولع ولع والدلع دلع
والشوق صار بقلبي متل نار واندلع
همساتك وغمزاتك ورقصاتك وكل هالدلع
فكرت كتير وفتشت عا كلمة السهل الممتنع
لقيتها بقلبي محفور اسمك عليها متل شي باب كان مسكر وأنشلع
صعبي كتير وقت ما الشاعر يصير يفتش عن الكلمات
ما بيخلي مطرح بالسما وعالارض وفوق الغيمات
بس كل الكلام بيخرس وقت ما شفافك بتهمس بالتمتمات
وقت ما بيفوت بدينتي كلمة حبيبي بحبك وبعشقك وبدي أكلك متل ما بتاكل العصفوره الحبيبات
من وين رح بجيب بعد إحساس وشعر وغنيات؟
من وين إذا ما فتحتي تمك وطلعت منو الآهات ؟
وكيف رح يولع الحطب وتشعل النار ؟
وكيف رح أقدر بعد انظم لك شعار ؟
إذا ما التقو تومين زغار كبار
وحبو بعضن بقوه ليل نهار
وما يتركو بعضن شو ما صار
ومن كتر ما حبو بعضن حسو بدوار
ودارت الدني فيهن تا يرجعو متل ولاد زغار
ودوار الشمس دلهن عا وكر من الأوكار
عشعشو فيه متل عصافير الكنار
والوانهن الصفرا والبرتقاليه بلون الشمس وبلون النار
الحب منو لغز وما فيه أسرار
الحب يلي شعرو فيه متل ما شعرو بالدوار
ممتع ومخيف وقوي وجبار
الحب بيهدم جبال وبيحلي ملح البحار
الحب بيكسر حواجز الخوف وبيطير من دون طيار
بيتحدى المستحيل وبيمشي ضد التيار
الحب بيلاقينا أوقات بنص الطريق وبيغير لنا المسار
بياخدنا لبيتنا الحقيقي ولدنيي نحنا فيها صحاب البيت مش الزوار
منشان هيك رح اخترع لغه جديدي
أحرفها بالملايين ونغماتها فريدي
كل حرف فيها بيعني حياة سعيدي ومديدي
وكل نغمه فيها سيمفونيه أبديه وقصيدي
لغه كل همها تزبط مواعيدك عا مواعيدي
ملوني بلون أحمر بيهدر من وريدي
وكل حروفها مكونين من اسمك وصارو جمله مفيدي
مجنون يا روحي ونيالي أنا
انتي فرحتي وانتي الهنا
منشان هيك ما تغيري اسمك إذا بتريدي
من قاموس ألان صفا