١٢ سنة يا أمي صارلك غايبي عني
١٢ سنة يا أمي ضجراني بلاكي الجنة
١٢ سنة متل اليوم انتي رتحتي وإطمنتي
وانا يا أمي بعدني مش مستوعب غيابك
يلي رح بيجنني
متل اليوم من ١٢ سنة
غاب القمر
متل اليوم من ١٢ سنة
انطفى ضو كان مشعشعني
بس ما عرفتي يا أمي إنو بس فليتي
طلعت نبتة الحلم يلي زرعتيها بقلبي ،
اليوم صارت بستان عشق مليان شجر
الحلم يا أمي مش ضعف
،هيك تعلمت منك
الحلم منو هروب من الحقيقة
الحلم هوي الحقيقة
يلي ناطرة الشجعان تا يعيشوها
الحلم منو حياة محدودة وقصيرة
حلمك يا أمي اليوم عايش فيي
وهو النور يلي منور عينيي
حلمك يلي ما كان يعرف حدود
صارت حدودو السما
وحلمي يلي كان موعود
صار طفل زغير عم يحلم جواتي أنا
وكل يوم يا أمي بيضحك الطفل
وبيغني عتابا وميجانا
وغنيتك المفضلة صارت غنيتو
وكل ما يعشق بيردد ويقول
متل ما كنتي تغني
زيديني عشقاً زيديني ، يا أحلى نوبات جنوني زيديني
وأنا صرت يا أمي مجنون
وجنوني كلو حب ومرح وهنا
وشو بدي قلك يا أمي بهاليوم ؟
،غير إنو حلمك الكبير يلي صار شجرة كبيرة
عم أتفيا تحتو كل يوم أنا
انتي يا نسيمة النسمة
يلي عم أتنشقها كل يوم
كل يوم من عمري عم يزيد عا عمرك عمر
يا عمري أنا
اليوم يا أمي منو يوم حزن
القيامة يا أمي إن كانت حقيقة
بتكون بقيامتك يوم ما بلاقيكي أنا
نامي يا حلوي ومهضومي
نامي يا أم الحلم
ابنك يلي أخذ حلمك وعايش على ريحة عطرو
صار يرضع حليب الحلم من نور الشمس كل يوم
متل ما كنتي ترضعيه من صدرك
ودفى حضنك يا أمي عم آخدو كل يوم من حلمك
نامي يا حبيبتي ..أنا رح أضحك ضحكاتك البهلوانية عنك
وانتي ونايمة يا أمي ما تواخذيني إذا وعيتك من نومك
بكون تذكرت نكتة
او نهفه من نهفاتك
بحبك يا أمي بموتك
وبحبك بحياتك
No comments:
Post a Comment