كبسة زر

ألان صفا
بلشت اوعى عالدني حواليي وبلشت ميز بين الألوان
بلشت أعرف شو هوي الفرح وشو هوي الحزن
بلشت حس بالوفره وبلشت حس بالشح
العالم حواليي كان زغير
كان متل دكان عندو كم غرض بس منو سوبر ماركت
لمن بلشت أعرف هودي كلن بلشت أعرف مميزاتي يلي الله عطاني ياهن
حسيت حالي أغنى انسان بالدني وقت ما بلشت استعمل مخيلتي يلي هي من أعظم العطايا يلي الله عطاني ياها
كنت بس اكبس كبسة زر عامخيلتي وكانت تاخدني عا كواكب تانيه هونيك كانو الناس يحلمو متلي وكانو يفهمو علي
كان في مرايات كثيره وين ما رحت كان في مرايه وكل مره تطلعت بالمرايه شفت عالم جديد وتعلمت أشياء جديده وأفق أعلى ومجالات أوسع يمكن هيدا يلي خلاني صير مبدع بتزيين الشعر ؟
وكل مره كنت أرجع من حلمي للواقع كنت خبر اصحابي شو صار معي وبأيه مدينه كنت وكم طياره نزلو وطلعو وأنه كنت بباريس قبل الضهر ومرقت بطريقي عا روما وهلق أنا هون
كانو رفقاتي يطلعو فيي ويقولو أنت ملك التفنيص بلا منازع
اصلاً هني ما كان عندن كبسة الزر يلي كان عندي ياها ،كانو بلا مخيله وكنت أشفق عليهن
مهما كان الواقع رمادي ومضجر وصعب ومهما كانت التحديات كبيره ما في نهار نسيت اكبس عالزر حتى أقدر عبي خزان الحيويه ولحتى ما خلي الصعوبات تتغلب علي
بالمدرسه يلي تعلمت فيها كانو يعلمونا الأحرف الأبجديه بس بمدرسة الحياة تعلمت اكتب أحرف ما بتنكتب بحبر أحرف من لغه عالميه بيعرفوها الغني والفقير المتعلم والجاهل والملحد والمتدين
هيدي اللغه اسمها الأنسانيه
هي لغة العيون يلي ما بتكذب
وهيدا يلي دايماً بيخليني حب ويكون عندي شغف وولع أكبر بالانسان ككائن بيوزع السعاده للاخرين
كائن خلق على صورة الله من الجمال والحسن والحكمه والعدل من دون أي تفرقه بين دين أو عرق أو لون أو خلفيه
كلنا موجودين بطريق اسمو التفتيش عن معنى الحياة وبطريقنا كتار منا بيفتكرو انو المال يمكن بيجلب السعاده
وكتار كمان بيفتكرو انو السلطه بتعطيهن الأمان والسيطره على وضعن
بس شفت انو لا المال ولا السلطه قدرت تعطي السعاده والأمان للبشر بالرغم انو مش غلط يكون الأنسان طموح ويشتغل حتى يحقق مستقبل جيد انما يلي بيخليني كون على حذر من طريق الشهره هي بأنها لم تجلب بنهاية المطاف ألسعاده لاصحابها انما بالعكس تماماً
حب الأنسانيه وحب العطاء توأمان
لانه يلي بيحب خيو الأنسان بيعطيه من دون مقابل
ونتيجة العطاء هوي الفرح
والفرح أو السعاده هي العمله الصعبه يلي الكل راكضين حتى يوصلولها
الحلم الواعي منو حلم بتفيق منو وبتقول يا الله يا ريتني ما وعيت
الحلم الواعي هو الحلم المستمر يومياً وقت ما بتعرف كيف تشتغل وتجهد منشان مستقبلك وكمان وقت ما بتتمتع بالحياة وبتشوف الأحتمالات وما بتركز على المعوقات
وقت ما بتلتقي بشخص جديد أو بصديق قديم ركز على الأيجابيات وفكر كيف فيك توصلو السعاده لهيدا الشخص فكر أنه هيدا اللقاء هوي لقاء مميز
جرب تعطي الأفضل حتى تلقائياً تأخذ الأفضل
جرب كل ما تلتقي بأنسان أنك تزيد على يومه لمسة حنان وفرح وأمل وسعاده
بتذكر اللوح الأسود بالمدرسه ؟
لو فيك تعمل لوح للتذكير وتحطو بالكوريدور حد الباب منشان تقرا شو مكتوب عليه قبل ما تضهر من البيت كل يوم
كتوب عاللوح : الرحله بعدها بأولها .ما تاخذ معك عالرحله أشياء مش عايزها .
ما تاخد معك وجه عبوس ولا تاخذ معك قلب كئيب وما تاخذ معك أحكام مسبقه عن الآخرين
خود معك بهالرحله البسمه عا شفافك وأفكار ايجابيه بتوصلك للمحطه الاخيره ويلي هيي معنى الحياة
وما تنسى تكبس الزر